सफलताको जङ्गलमा
केही असफलताका
रुखहरू पनि रोप्नुपर्ने हुन्छ
तब त प्रकृतिको
मजा लिन सकिन्छ
केही प्राकृतिक उपहारहरू
जङ्गलमा रमाउन चाहनेहरूलाई
दिन सकिन्छ
तर जब जब
प्रकोपहरू आउँछन्
यो जङ्गल डग्मगाउँदैन
केही सफलताका
रुखहरू लड्न सक्छन्
यिनै रुखमा
बाँदरहरू आएर चढ्न सक्छन्
फेरि ढलेका रुखहरू बढ्न सक्छन्
केही तस्करले काटेर
त्यही रुखबाट शिखरतिर
चढ्न सक्छन्
तर यो जङ्गल
छिटै सखाप हुँदैन
तृष्णाको पसिना चुहाएर
यसै जङ्गलबाट फर्कनेहरूलाई
फेरि आउनु पर्छ भन्दै
यी रुखहरू रुँदैनन्
त्यसैले,
सफलताको जङ्गलमा
केही असफलताका
रुखहरू पनि रोप्नुपर्ने हुन्छ ।
रोप्नुपर्ने हुन्छ ।।