काठमाडौं । डोल्पाको जगदुल्ला गाउँपालिका–५ स्थित गैरी गाउँमा गए राति पहिरोसहितको बाढी बस्तीमा पसेको छ । उक्त घटनामा एक महिलाको मृत्यु भएको छ भने ६ जना घाइते भएका छन् ।
बाढीले कम्तीमा १० वटा घरमा क्षति पुर्याएको जिल्ला प्रहरी कार्यालय डोल्पाले जनाएको छ । डोल्पाका प्रहरी प्रमुख प्रहरी नायव उपरीक्षक अनिलराज गिरीका अनुसार वर्षापछि राति करिब ३ बजे गैरीगाउँ नजिक रहेको धुला खोलामा हिलो–माटोसहितको बाढी आएको थियो ।
बाढी बस्तीमा प्रवेश गरेको सूचना प्राप्त हुनासाथ प्रहरी चौकी माझगाउँ र इलाका प्रहरी कार्यालय काईगाउँबाट प्रहरी टोली तत्काल घटनास्थलतर्फ परिचालन गरिएको थियो ।
बाढीमा परी घाइते भएकी ५६ वर्षीया आनन्दी विकलाई प्रहरीले उद्धार गरी उपचारका लागि झ्याकोट स्वास्थ्य चौकीतर्फ लैजाँदै गर्दा बाटोमै मृत्यु भएको डीएसपी गिरीले जानकारी दिए ।
घटनामा एक पुरुष, तीन महिला र दुई बालिका गरी ६ जना घाइते भएका छन् । उनीहरूको झ्याकोट स्वास्थ्य चौकीमा उपचार भइरहेको प्रहरी प्रमुख गिरीले बाह्रखरीलाई जानकारी दिएि । घाइतेहरूको अवस्था र थप विवरण संकलन भइरहेको छ ।
घटनापछि जिल्ला प्रहरी कार्यालय डोल्पाबाट प्रहरी निरीक्षक पदम रावलको नेतृत्वमा पाँच सदस्यीय थप प्रहरी टोली राहत, उद्धार तथा क्षति विवरण संकलनका लागि घटनास्थलतर्फ पठाइएको छ ।
