काठमाडौं । स्ट्रेट अफ हर्मोजमा पानामाको झण्डा बोकेको एउटा व्यापारिक जहाजमाथि ड्रोन आक्रमण भएपछि अमेरिकाले इरानका विभिन्न सैन्य ठेगानाहरूमा शक्तिशाली हवाई हमला गरेको छ।
अमेरिकी सेन्ट्रल कमान्डले शनिबार ‘एमटी किकु’ नामक ट्याङ्करमाथि भएको आक्रमणको जवाफमा इरानभित्रका सैन्य उपकरण, सञ्चार प्रणाली, हवाई प्रतिरक्षा केन्द्र र ड्रोन भण्डारण स्थलहरूलाई निशाना बनाएको पुष्टि गरेको छ । कमान्डले जारी गरेको विज्ञप्ति अनुसार, जुन १७ मा भएको युद्धविराम सम्झौता पालना गर्ने अवसर दिइए पनि इरानले त्यसलाई लत्याउँदै व्यापारिक जहाजहरूमाथि आक्रामकता जारी राखेकाले यो सैन्य कदम चालिएको हो।
यसअघि जुन २५ मा सिङ्गापुरको झण्डा भएको ‘एमभी एभर लभ्ली’ नामक जहाजमाथि भएको आक्रमणको बदलामा पनि अमेरिकाले इरानमाथि प्रहार गरेको थियो।
अमेरिकी राष्ट्रपति डोनाल्ड ट्रम्पले सामाजिक सञ्जाल ‘ट्रूथ सोसल’ मार्फत इरानलाई कडा चेतावनी दिँदै तेहरानले ‘कहिल्यै नचेत्ने’ बताएका छन्।
उनले इरानले पटक–पटक युद्धविराम उल्लंघन गरेको आरोप लगाउँदै लेखेका छन्, ‘अब एउटा यस्तो विन्दु आउन सक्छ जहाँ हामी नरम भइरहन सक्दैनौँ। यदि हामीले सैन्य रूपमा यो काम पूरा गर्नुपर्ने अवस्था आयो भने, इरानको इस्लामिक गणतन्त्रको अस्तित्व नै समाप्त हुनेछ।’
अमेरिकी आक्रमण लगत्तै खाडी क्षेत्रमा तनाव थप चुलिएको छ। कुवेत र बहराइन दुवैले आफ्ना हवाई प्रतिरक्षा प्रणालीहरू सक्रिय पारिएको जानकारी दिएका छन्। कुवेती सशस्त्र बलले सम्भावित मिसाइल र ड्रोन आक्रमणको सामना गरिरहेको बताउँदै सर्वसाधारणलाई सुरक्षा निर्देशनहरू पालना गर्न आग्रह गरेको छ। यस्तै, बहराइनको गृह मन्त्रालयले पनि आफ्ना नागरिकहरूलाई शान्त रहन र सुरक्षित स्थानमा बस्न आह्वान गरेको छ।
इरानले भने पछिल्लो अमेरिकी हमलाका बारेमा हालसम्म कुनै आधिकारिक टिप्पणी गरेको छैन। यद्यपि, यसअघिको आक्रमणको सन्दर्भमा इरानको विदेश मन्त्रालयले अमेरिकी सेनासँग सम्बन्धित लक्ष्यहरूमा जवाफी आक्रमण गरेको दाबी गरेको थियो। इरानको दाबी अनुसार उक्त व्यापारिक जहाजले अनाधिकृत मार्ग प्रयोग गरेकाले कारबाही गरिएको थियो।
