काठमाडौं । राष्ट्रिय स्वतन्त्र पार्टी (रास्वपा) का सांसद हरि ढकालले सिंहदरबारको नाम परिवर्तन गर्नुपर्ने आफ्नो अडान दोहोर्याएका छन् । उनले सिंहदरबारको नाम परिवर्तन गर्नुपर्ने विषयमा आफू आफ्नो तर्कमा अडिग रहेको बताएका हुन् ।
ढकालले सिंहदरबारको नाम परिवर्तन हुनुपर्ने भनेर आज दिएको अभिव्यक्ति विवादित बनेपछि सामाजिक सञ्जाल फेसबुकमा लेख्दै यस्तो बताएका हुन् । उनले आफू आफ्नो तर्कमा अडिग रहेको बताउँदै सिंहलाई दया र करुणाको प्रतीक मान्न नसकिने दाबी गरेका छन् । ‘म मेरो तर्कमा अडिग छु—सिंह दया र करुणाको प्रतीक होइन । सिंह हिंस्रककै प्रतीक हो, घमण्डकै प्रतीक हो शासक कै प्रतीक हो,’ ढकालले भनेका छन् ।
उनले सिंहदरबार निर्माणका क्रममा श्रमिकमाथि भएको शोषणको इतिहास आफूले पहिले नै पढेको बताएका छन् । सिंहदरबारको नाम र त्यसको स्वभाव तथा भाव–भंगीबीच मेल नहुने विषयमा आफूले पहिलेदेखि नै धारणा राख्दै आएको उनको भनाइ छ ।
ढकालले यसपटकको मात्र नभई विगतका परिवर्तनका क्रममा पनि विभिन्न स्थानका नाम परिवर्तन गरिएको स्मरण गर्दै आवश्यक परे सिंहदरबारको नामसमेत परिवर्तन गर्न सकिने उल्लेख गरेका छन् । ‘पूरा भिडियो धेरैले हेर्नुभएको छैन, मलाई थाहा छ । हामी कार्यक्रममा सहभागी हुने चाहिँ दंग छौं,’ उनले भनेका छन् ।
