काठमाडौं । विदेशी विनिमय अपचलन तथा सम्पत्ति शुद्धीकरणको गम्भीर कसुरमा संलग्न रहेको अभियोगसहित विकल पौडेल र उनकी श्रीमती एलिना बस्नेतविरुद्ध ६८ करोड ९४ लाख बिगो मागदामबी गर्दै विशेष अदालतमा अदालतमा मुद्दा दर्ता भएको छ ।
राजस्व अनुसन्धान विभागले सुरक्षण मुद्रण केन्द्रका तत्कालीन कार्यकारी निर्देशक रहेका पौडेलले अवैध रूपमा विदेशी विनिमय कारोबार गरी सम्पत्ति शुद्धीकरण गरेको दाबी गरेको छ । पौडेल दम्पतीले अवैध रूपमा विदेशी विनिमय कारोबार गरेको पुष्टि भएको दाबी विभागको छ ।
विभागले कुल ६२ करोड ६५ लाख ९१ हजार ८९३ रुपैयाँ बिगो कायम गरेको छ । विभागको अनुसन्धान प्रतिवेदनका आधारमा जिल्ला सरकारी वकिल कार्यालयले बुधबार ९वैशाख १६० काठमाडौं जिल्ला अदालतमा अभियोगपत्र दायर गरेको हो ।
यसअघि पनि विदेशी विनिमय (नियमित गर्ने) ऐन, २०१९ अनुसार २०८१ असोज १४ गते काठमाडौं जिल्ला अदालतमा मुद्दा दायर गरिएको थियो । थप अनुसन्धानका क्रममा अवैध रूपमा आर्जित सम्पत्तिसम्बन्धी गतिविधि पुष्टि भएको दाबी विभागले गरेको छ ।
पौडेलमाथि ६१ करोड १३ लाख २१ हजार १५३ रुपैयाँ २० पैसा र श्रीमती एलिना बस्नेतमाथि ७ करोड ८१ लाख ४४ हजार ५१ रुपैयाँ ५० पैसा बिगो कायम गर्दै सम्पत्ति शुद्धीकरण कसुरको अभियोगमा सजाय माग गरिएको छ ।
उक्त ऐनको दफा ३० अनुसार बिगोको दोब्बर जरिवाना तथा कसुरको मात्राअनुसार कैद सजाय गर्न विभागको मागदाबी छ । ऐनअनुसार अवैध रूपमा आर्जित सम्पत्ति जफत गर्नुपर्ने मागसमेत गरिएको छ ।
