काठमाडौं । अमेरिका र इरानबीच रणनीतिक रूपमा महत्त्वपूर्ण स्ट्रेट अफ होर्मुज पुनः सञ्चालन गर्ने विषयमा वार्ता सकारात्मक दिशामा अघि बढेको संकेतपछि अन्तर्राष्ट्रिय बजारमा कच्चा तेलको मूल्य तीन सातायताकै न्यून स्तरमा झरेको छ ।
मंगलबार ब्रेन्ट कच्चा तेलको मूल्य करिब ५ प्रतिशत घटेर प्रतिव्यारेल ८० डलरभन्दा तल पुगेको छ भने अमेरिकी वेस्ट टेक्सास इन्टरमिडियट पनि ५ प्रतिशतभन्दा बढी घटेर प्रतिव्यारेल ७६ डलरमा कारोबार भएको छ ।
अमेरिकी विदेशमन्त्री मार्को रुबियो र अर्थमन्त्री स्कट बेसेन्टले होर्मुजमार्फत जहाज आवतजावत पुनः सुचारु गर्ने विषयमा प्रगति भएको र सम्झौता मंगलबार वा बुधबारसम्म हुन सक्ने बताएका छन् । यद्यपि, इरानले भने अमेरिकासँग प्रत्यक्ष वार्ता नभएको र ओमानमार्फत छलफल भइरहेको जनाएको छ ।
फेब्रुअरी अन्त्यदेखि सुरु भएको अमेरिका–इरान द्वन्द्वपछि इरानले होर्मुजमा अधिकांश जहाज आवतजावत रोकेको छ भने अमेरिका पनि इरानी बन्दरगाहमा नौसैनिक नाकाबन्दी गरिरहेको छ । यसबीच इरान समर्थित हुथी विद्रोहीहरूले साउदी अरबका लाल सागरस्थित बन्दरगाहमा पनि नाकाबन्दी गरेपछि वैकल्पिक समुद्री मार्गसमेत असुरक्षित बनेको छ ।
