काठमाडौं । किशोरीहरूलाई अनैतिक कार्यमा लगाएको आरोपमा कास्कीको पोखरा महानगरपालिका–१८ चिसाखोलाका विभिन्न खाजाघरबाट प्रहरीले चारजना महिलालाई पक्राउ गरेको छ।
जिल्ला प्रहरी कार्यालय, कास्कीका अनुसार पक्राउ पर्नेमा पोखरा महानगरपालिका–१८ बस्ने ४२ वर्षीया मनदेवी क्षेत्री, ४१ वर्षीया इन्द्रा लामा, ४५ वर्षीया टिकामाया तामाङ र ४० वर्षीया मिनकुमारी गुरुङ रहेकी छन्।
उनीहरूलाई मानव बेचबिखन तथा ओसारपसार मुद्दामा अदालतबाट शुक्रबार सात दिनको म्याद थप गरी अनुसन्धान अगाडि बढाइएको प्रहरी नायब उपरीक्षक वीरेन्द्रकुमार पासवानले जानकारी दिए।
आर्थिक अवस्था कमजोर भएका बालिकालाई विभिन्न प्रलोभन देखाई अनैतिक कार्यमा लगाउने गरेको सूचनाका आधारमा प्रहरीले ती महिलालाई पक्राउ गरेको हो। एक खाजाघरबाट एक बालिकाको उद्धार गरिएको जिल्ला प्रहरी कार्यालय कास्कीले जनाएको छ।
