काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)ले पितृ शोकमा रहेका नेकपा एमालेका अध्यक्ष केपी शर्मा ओलीप्रति समवेदना प्रकट गरेका छन् ।
शुक्रबार साँझ ओलीलाई समवेदना प्रकट गर्दै बालेनले पिताजस्तो रक्षक कोही नभएको र पिताको अनुपस्थितिले जिन्दगीमा रित्तोपन ल्याउने बताएका हुन् ।
‘पिताजस्तो रक्षक कोही छैन, पिताजस्तो गुरु कोही छैन, पिताजस्तो देवता पनि कोही छैन । केही समय अघि मात्रै पिता गुमाएकाले मलाई महसुस छ-पिताको अनुपस्थितिले जिन्दगीमा कति रित्तोपन ल्याउँछ, कस्तो अपूरणीय अभाव ल्याउँछ,’ उनले भनेका छन्, ‘पूर्वप्रधानमन्त्री केपी शर्मा ओलीलाई पर्न गएको पितृशोकमा हार्दिक समवेदना व्यक्त गर्दछु। पिताजीप्रति हार्दिक श्रद्धाञ्जली, वैकुण्ठवास होस्।’
पूर्वप्रधानमन्त्री समेत रहेका केपी ओलीका पिता मोहनप्रसादको ९७ वर्षको उमेरमा आज भक्तपुरको नेपाल कोरियामैत्री अस्पतालमा उपचारका क्रममा निधन भएको थियो ।
