काठमाडौं । अमेरिकाले एकैदिन डिपोर्ट (निष्कासन) गरेका ९१ मध्ये ८० जना नेपाल आइपुगेका छन् । अमेरिकाले डिपोर्ट गरेका उनीहरूलाई चार्टर विमानमार्फत मंगलबार काठमाडौं ल्याइएको हो । नेपाल आइपुगेकाहरूमध्ये ७९ पुरुष र एक महिला छन् ।
नेपाल आइपुगेकाहरू सबैजनालाई विमानस्थल अध्यागमन कार्यालयले प्रहरीको मानवबेचविखन अनुसन्धान ब्युरो पठाएको थियो । यसरी नेपाल ल्याइएकाहरूमध्ये एकजना विद्यार्थी भिसामा अमेरिका पुगेका युवा रहेको पाइएको छ ।
उनलाई ‘ओभर स्टे’ कसुरमा अमेरिकाको अध्यागमनले नियन्त्रणमा लिएर नेपाल फर्काएको खुलेको ब्युरोका प्रमुख एसएसपी कृष्ण पंगेनीले जानकारी दिए । ७९ जना भने अवैध बाटो हुँदै विभिन्न मितिमा अमेरिका पुगेको पाइएको छ ।
अमेरिकाले डिपार्ट गरेका थप ११ जना विभिन्न विमानमा नेपाल आउनेछन् । अमेरिकामा बस्न कानुनी आधार स्थापित नगर्ने नेपाली नागरिकलाई डिपोर्ट गर्दै आएको छ ।
अमेरिकाको राष्ट्रपतिमा डोनाल्ड ट्रम्प निर्वाचित भएयता हालसम्म ५८३ नेपाली डिपोर्ट भएका छन् ।
