काठमाडौँ । उपराष्ट्रपतिको विषयमा टुंगो लगाउन १० दलीय गठबन्धनको बैठक सिंहदरवारमा बस्न लागेको हो । सत्ता गठबन्धनबाट नै उपराष्ट्रपतिमा तीनजना उम्मेदवार भएका छन्।
त्यसको विषयमा छिनोफानो गर्नका लागि गठबन्धनको बैठक बस्न लागेको जसपाका कार्यकारिणी सदस्य राजकिशोर यादवले बताए ।
उनले भने, ‘गठबन्धनबाट उपराष्ट्रपतिका एकजना मात्र उम्मेदवार रहनेछ, त्यसका विषयमा छलफल गर्न बैठक बस्न लागेको हो ।’ सत्ता गठबन्धनको उम्मेदवार रामसहाय यादव हुन् । प्रमिला यादव र ममता झाले उपराष्ट्रपतिको उम्मेदवारी फिर्ता लिने उनले दावी गरे ।
तर जनमत पार्टीका अध्यक्ष डा.सिके राउतले शनिबार गठबन्धनमा निर्णय भएपनि मित्रवत प्रतिस्पर्धाका लागि ममता झाको उम्मेदवारी कायम रहने जानकारी दिएका थिए ।
निर्वाचन अधिकृतको कार्यालयले जसपाबाट उपराष्ट्रपतिको उम्मेदवार बनेका रामसहाय यादवको उम्मेदवारी कायम रहने निर्णय गरिसकेको छ । त्यसले गर्दा गठबन्धनलाई उपराष्ट्रपतिको विषयमा निर्णय लिन भने सजिलो हुने देखिएको छ ।
