काठमाडौं । रास्वपा सांसद हरि ढकालले भिजिट भिसाको सेटिङमा पैसा बुझाइएको १२ सय प्रमाण आफूकहाँ आइपुगेको दाबी गरेका छन्। संसद् भवन परिसरमा सञ्चारकर्मीहरूसँग कुरा गर्दै अधिकांश पैसा नगद नै बुझाएको पाइएको बताए।
उनले पार्टीका सांसद सोविता गौतम, मनिष झा, शिशिर खनाल र आफूले सामाजिक सञ्जालबाट प्रमाण माग्दा १२ भन्दा बढी पैसा बुझाएका प्रमाणहरू आएको बताए।
उनले भने, ‘भिजिट भिसामा जानको लागि एयरपोर्टमा बुझाउने एउटा रकम हुँदो रहेछ। हामीलाई दलालहरूलाई बुझाएको प्रमाण आएको छ। दलाललाई बुझाउने रकम पनि कुनै क्यासमा, कुनै बैङ्क ट्रान्जेक्सन गरिएको छ। र एयरपोर्टमा बुझाउँदा प्रायजसो नगदमा कारोबार भएको रहेछ। त्यसैले हामीले छानबिन आयोगको माग गरेका हौंं। लाखौँ युवाहरू एजेन्टबाट बुझाएको पैसामार्फत खोज्दा जाँदा त मुख्य ठाउँसम्म त पुगिन्छ होला नि त।’
उनले भिजिट भिसामा महिलालाई दुबई लगेर कुवेत पुर्याइएको सूचना पनि आएको बताए। उनले २०६४ पछि गृहमन्त्री भएका सबैको छानबिन गर्नुपर्ने भन्दै गृहमन्त्रीले छानबिन प्रभावित पार्नसक्ने भएकाले राजीनामा दिनैपर्ने अडान सुनाए।
