काठमाडौं । नागरिक उन्मुक्ति पार्टी (नाउपा) का संस्कृति, पर्यटन तथा नागरिक उड्डयन राज्यमन्त्री अरूणकुमार चौधरीले सोमबार बिहान राजीनामा बुझाउँदैछन्।
आइतबार नै राजीनामा बुझाउने तयारी गरेको भए पनि प्रधानमन्त्री केपी शर्मा ओली बेली ब्रिज उद्घाटन गर्न हुम्ला गएकाले रोकिएको नाउपा अध्यक्ष रञ्जिता श्रेष्ठले बताइन्।
‘प्रधानमन्त्रीज्यू राति १० बजेमात्रै फर्कनुभएछ। आज बिहान राजीनामा बुझाउँदैछौं। प्रधानमन्त्री भेटिनुभयो भने उहाँलाई दिन्छौं। नत्र प्रधानमन्त्री तथा मन्त्रिपरिषद् कार्यालयमा दर्ता गर्छौं,’ उनले भनिन्, ‘पत्र दर्ता भएपछि राजीनामा दिएको भइहाल्यो।’
शनिबार बसेको नाउपा संसदीय दलको बैठकले सरकारलाई दिएको समर्थन फिर्ता र सरकारबाट पनि हट्ने निर्णय गरेको थियो। नाउपाले सरकारलाई दिएको समर्थन फिर्तासँगै प्रधानमन्त्री ओलीले विश्वासको मत लिनुपर्ने भएको छ।
संविधानको धारा १०० को उपधारा २ मा, ‘प्रधानमन्त्रीले प्रतिनिधित्व गर्ने दल विभाजित भएमा वा सरकारमा सहभागी दलले आफ्नो समर्थन फिर्ता लिएमा ३० दिनभित्र प्रधानमन्त्रीले विश्वासको मतका लागि प्रतिनिधि सभा समक्ष प्रस्ताव राख्नु पर्नेछ,’ भन्ने उल्लेख छ।
