बुर्तिबाङ । ढोरपाटन नगरपालिका ५ अस्तुमा भएको पिकअप जिप दुर्घटना थप एक जनाको मृत्यु भएको छ । उपचारका लागि पोखरा लैजाँदै गर्दा ढोरपाटन नगरपालिका २ की २१ वर्षीया टिकाकुमारी कुँवरको मृत्यु भएको जिल्ला प्रहरी कार्यालय बागलुङका सूचना अधिकारी बसन्त पाण्डेले जानकारी दिए ।
उनका अनुसार उनीसँगै मृतकको संख्या तीन पुगेको छ । शुक्रबार भएको दुर्घटनामा ढोरपाटन नगरपालिका २ की ७२ वर्षीया खिमकुमारी बुढा र निसीखोला गाउँपालिका १ देविस्थानका ७३ वर्षीय नरबहादुर कार्कीको घटनास्थलमै मृत्युु भएको थियो । घाइते १३ जना मध्ये ढोरपाटन नगरपालिका २ की २९ वर्षीया निरमाया खत्रीको डिस्चार्ज भएको छ । अन्य घाइतेहरुको उपचारका लागि पोखरा र पाल्पा रेफर गरिएको छ ।
शुक्रबार बुर्तिबाङ बजारदेखि ढोरपाटन नगरपालिका २ खल्बाङ अर्नाकोट जाँदै गरेको लुम्बिनी प्रदेशको ०१ ००१ च १७७५ नम्बरको पिकअप दुर्घटना भएको थियो ।
