काठमाडौं । निर्माणाधीन घरको छतबाट लडेर सुनसरीमा एक जनाको मृत्यु भएको छ।
आइतबार बिहान इटहरी उपमहानगरपालिका–२० तरहरामा निर्माणाधीन घरको छतबाट लडेर प्रहरी सहायक निरीक्षक (असई) ४५ वर्षीय प्रेम कटुवालको मृत्यु भएको हो।
घरमा पानी हाल्ने क्रममा चिप्लिएर आफ्नै निर्माणाधीन घरको छतबाट लडेर मृत्यु भएको सुनसरी प्रहरीका प्रवक्ता डिएसपी योगराज खतिवडाले जानकारी दिए।
छतबाट झरेपछि गम्भीर अवस्थामा रहेका कटुवालको विराटनगरको न्युरो आर्या अस्पताल विराटनगरमा मृत्यु भएको प्रहरीले जनाएको छ। कटवाल २ तले घरको माथिबाट तल नालीमा खसेका थिए।
धनकुटामा कार्यरत कटुवाल केही दिनअघि मात्रै छुट्टीमा आएर घर निर्माणको काम गरेको प्रहरीले जनाएको छ।
