एजेन्सी । युक्रेनी अधिकारीहरूले पछिल्लो रूसी आक्रमणमा कम्तीमा २५ जनाको मृत्यु भएको जनाएको छ ।
डोनेट्स्कमा भएको आक्रमणमा ४० जना घाइते भएको स्थानीय अधिकारीहरूले बताएका छन् । यस आक्रमणमा खार्किभ र ओडेसालगायत अन्य क्षेत्रका आवासीय परिसर र पूर्वाधारलाई पनि निशाना बनाइएको थियो ।
अमेरिकाले युक्रेनलाई सैन्य सहायता र गोप्य जानकारी प्रदान गर्न प्रतिबन्ध लगाएको छ । त्यसपछि रूसले पछिल्ला दिनमा युक्रेनमा आक्रमणलाई तीब्र बनाएको छ ।
युक्रेनमा रूसको पछिल्लो हमलापछि पोल्याण्डका प्रधानमन्त्री डोनाल्ड टस्कले सामाजिक सञ्जाल पोस्ट लेखेका छन् ।
उनले लेखेका छन्, ‘जब तिमीले जंगलीलाई खुसी बनायौँ तब यस्तो हुन्छ । धेरै बम, धेरै क्रोध, धेरै पीडितहरू ।
यसअघि गत हप्ता अमेरिकी राष्ट्रपति कार्यालयमा राष्ट्रपति डोनाल्ड ट्रम्प र युक्रेनी राष्ट्रपति भोलोडिमिर जेलेन्स्कीबीच भेटवार्ता भएको थियो ।
रूस र युक्रेनबीच युद्धविराम गराउने प्रयासमा भएको बैठक चर्को बहसमा परिणत भएको थियो ।
युक्रेनमा यो हमला अमेरिकी राष्ट्रपति डोनाल्ड ट्रम्पको भनाइपछि भएको हो, जसमा उनले रूसमाथि ठूलो मात्रामा प्रतिबन्ध र कर लगाउने बारेमा चेतावनी दिएका थिए ।
युक्रेनले पनि यसअघि बिहीबार राति रूसी आक्रमणमा पाँचजनाको ज्यान गएको बताएको थियो ।
