काठमाडौं । बाराको निजगढबाट १० किमि पश्चिममा सवारी दुर्घटना हुँदा दुई जनाको मृत्यु भएको छ।
निजगढबाट पथलैया जाँदै गरेको प्र २-०३-००१ख०६०७ नम्बरको टिप्पर र विपरीत दिशाबाट आइरहेको बा ०१-०२५च५०७६ नम्बरको कार दिउँसो सवा ३ बजे ठोक्किएका हुन्।
दुर्घटनामा कारमा सवार दुई जना घाइते भएकामा प्रसूति अस्पताल निजगढ बारामा उपचारको क्रममा मृत्यु भएको बाराका एसपी सन्तोष तामाङले जानकारी दिए।
उनका अनुसार कार चालक सर्लाहीका जितनारायण साह र सर्लाहीकै कारको बायाँ साइडमा बसेका नारायणहरी शर्मालाई अस्पतालले मृत घोषणा गरेको थियो। टिप्पर चालकको खोजी भइरहेको उनले बताए। हाल टिप्पर र कार घटनास्थलमै छन् भने बाटोमा अवरोध पुगेको छैन।
