सुनसरी । सुनसरीको गढी गाउँपालिका–१ मदेली झण्डा चोकबाट प्रहरीले चाइनिज पेस्तोल र गोलीसहित दुई जनालाई पक्राउ गरेको छ ।
मोरङको विराटनगर महानगरपालिका–१७ रानीबस्ती निवासी अन्दाजी ५१ वर्षीय नुर महोमद र विराटनगर महानगरपालिका–८ अशोकचोक निवासी ३२ वर्षीय इम्रान खानलाई प्रहरीले पक्राउ गरेको हो ।
प्रहरीका अनुसार गएराति करिब १ः२० बजे अस्थायी प्रहरी चौकी चाँदबेलाबाट गस्तीमा खटिएको टोलीले शंकास्पद अवस्थामा पैदल हिँडिरहेका महोमद र खानलाई रोकी चेकजाँच गरेको थियो ।
चेकजाँचका क्रममा नुर महोमदको साथबाट एक थान चाइनिज पेस्तोल र त्यसमा लोड गरिएको तीन राउन्ड गोली बरामद भएको प्रहरीले जनाएको छ । पक्राउ परेका दुवै जनालाई नियन्त्रणमा लिई इलाका प्रहरी कार्यालय दुहवीमा राखिएको छ । घटनाबारे थप अनुसन्धान भइरहेको प्रहरीले जनाएको छ ।
