काठमाडौं । जोय फाउन्डेशन नेपालले स्वयम्भु प्रहरी कार्यालयलाई तीन सेट कम्प्युटर र तीन सेट टेबल तथा कुर्सी वितरण गरेको छ। प्रहरी कार्यालय पूर्ण रूपमा ध्वस्त भएको वर्तमान अवस्थामा यी आधारभूत उपकरणहरू उपलब्ध गराउनु अत्यन्त आवश्यक थियो जसले प्रहरी कार्यालयलाई पुनः सञ्चालनमा ल्याउन मद्दत पुर्याउनेछ।
जोय फाउन्डेशन नेपालले कठिन परिस्थितिमा राष्ट्रिय हितमा सक्रिय भूमिका निर्वाह गर्दै आएको छ। कोभिड–१९ महामारीका क्रममा यस संस्थाले देशभर १०० वटा अक्सिजन कन्सन्ट्रेटर वितरण गरी स्वास्थ्य क्षेत्रमा महत्वपूर्ण योगदान पुर्याएको थियो।
त्यसैगरी, जोय फाउन्डेशन नेपालले विगत २५ वर्षदेखि तिलगंगा नेत्र विज्ञान संस्थासँग सहकार्य गर्दै नेपालभर आँखा शिविर सञ्चालन गर्दै आएको छ जसले विपन्न वर्गलाई आवश्यक नेत्र सेवा प्रदान गर्दै आएको छ। २०२३ को जाजरकोट भूकम्पपछिको राहतकार्य अन्तर्गत यसले प्रभावित बालबालिकालाई ट्रयाकसुट वितरण गरेको थियो।
थमेलस्थित नेपाली घर होटल परिसरबाट सञ्चालनमा रहेको जोय फाउन्डेशन नेपालले निरन्तर रूपमा देशभरका समुदायलाई सहयोग गर्दै आएको छ र आवश्यकताअनुसार तत्कालीन सहयोग प्रदान गर्दै राष्ट्रिय पुनर्निर्माणमा महत्वपूर्ण भूमिका निर्वाह गरिरहेको छ।
