काठमाडौं । सामाजिक सञ्जालका प्लेटफर्म बन्द गर्ने सरकारी निर्णय, भ्रष्टाचार र बेथितिविरुद्ध जेन–जी समूहले काठमाडौंको माइतीघरमा प्रदर्शन थालेको छ । शान्तिपूर्ण भनिएको विरोध प्रदर्शनका लागि युवाहरू बिहान ९ बजेदेखि नै भेला हुन थालेका थिए । त्यहाँ दुई घण्टा प्रदर्शन गरी उनीहरूले सभा गर्ने कार्यक्रम छ । त्यसपछि प्रदर्शन गर्दै नयाँ बानेश्वरसम्म पुग्ने अगुवाहरूले बताइएका छन् ।
जेन जी अगुवाहरूले यो आन्दोलनलाई ‘भ्रष्टाचारलगायत देशमा व्याप्त बेथितिविरुद्ध’ भनेका छन् । उनीहरू सडकमा आउनुको मूल कारणचाहिँ नेपालमा दर्ता हुन नआएका २६ वटा सामाजिक सञ्जाल प्लेटफर्ममाथि सरकारले लगाएको प्रतिबन्ध नै हो । जेन जीको प्रदर्शन तय भएसँग सरकारले पनि सुरक्षा व्यवस्था कडा पारेको छ ।
