काठमाडौं । भारतीय राज्य गुजरातको अहमदाबादमा बिहीबार दिउँसो भएको एयर इन्डियाको विमान दुर्घटनामा गुजरातका पूर्वमुख्यमन्त्री एवं भाजपा परिवारका वरिष्ठ सदस्य विजय रुपाणीको निधन भएको छ।
भाजपा सांसद संबित पात्राले सामाजिक सञ्जाल एक्समार्फत विजय रुपाणीको निधनमा शोक व्यक्त गरेका छन्। उनले लेखेका छन्, ‘अहमदाबादमा भएको दुर्भाग्यपूर्ण विमान दुर्घटनामा गुजरातका पूर्वमुख्यमन्त्री तथा भाजपा परिवारका वरिष्ठ सदस्य विजय रुपाणीजीको दुस्खद मृत्युको खबर अत्यन्तै पीडादायी र हृदयविदारक छ। उनको निधन गुजरातका लागि मात्र नभई सम्पूर्ण भारतीय राजनीतिको लागि अपूरणीय क्षति हो।’
भारतीय सञ्चारमाध्यमका अनुसार एयर इन्डियाको बोइङ ७८७ ड्रिमलाइनर विमान अहमदावादको सरदार वल्लभभाई पटेल अन्तर्राष्ट्रिय विमानस्थलबाट उड्नासाथ नजिकै बिहीबार दिउँसो १:३८ बजेतिर खसेको हो।
उक्त हवाईजहाजमा चालक दलका १२ जना सदस्यसहित २४२ जना सवार थिए। अहिलेसम्म दुर्घटनास्थलमा २०४ जनाको शव भेटिएको अधिकारीहरूले बताएका छन्।
