काठमाडौं । अख्तियार दुरुपयोग अनुसन्धान आयोगले प्रहरी नायब निरीक्षक (सई) खिमबहादुर खड्काविरुद्ध भ्रष्टाचार मुद्दा दायर गरेको छ ।
प्रहरी चौकी दुगौलिया, रुपन्देहीमा कार्यरत खड्काविरुद्ध मंगलबार विशेष अदालत काठमाडौंमा मुद्दा दायर गरिएको आयोगले जनाएको छ । आयोगका प्रवक्ता राजेन्द्रकुमार पौडेलका अनुसार सई खड्का सेवाग्राहीबाट लिएको ३० हजार रुपैयाँसहित पक्राउ परेका थिए ।
भारतबाट रुपन्देहीको दुर्गौलिया नाका हुँदै अवैधरूपमा घरायसी प्रयोजनका सामान ल्याउन सहजीकरण गरिदिने भन्दै खड्काले सेवाग्राहीसँग घुस मागेको उजुरी आयोगमा परेको थियो ।
उक्त उजुरीका आधारमा आयोगको कार्यालय, बुटवलबाट खटिएको टोलीले खड्कालाई ३० हजार रुपैयाँ घुससहित पक्राउ गरेको थियो ।
आयोगले ३० हजार रुपैयाँ कायम गरेर बिगो बमोजिम जरिवाना र कैद सजायको माग दाबी गरेको छ ।
