काठमाडौं । नवनियुक्त प्रधानमन्त्री पुष्पकमल दाहाल ‘प्रचण्ड’ ले आज पद तथा गोपनीयताको शपथ ग्रहण गर्नेछन् ।
उनले अपराह्न ४ बजे राष्ट्रपति कार्यालय शीतल निवासमा आयोजित विशेष समारोहमा राष्ट्रपति विद्यादेवी भण्डारीबाट शपथ ग्रहण गर्न गर्ने भएका हुन् ।
स्रोतका अनुसार प्रचण्डले केही मन्त्रीहरुसहित शपथ ग्रहण गर्ने तयारी गरेको छन् । जसमा नेकपा माओवादी केन्द्रबाट सुरुमा दुईजना मन्त्री बन्ने चर्चा सुरु भएको छ । प्रचण्डलाई प्रधानमन्त्री बनाउन भूमिका खेल्ने दुईजनालाई सुरुमै मन्त्री बनाउने चर्चा माओवादीभित्र सुरु भएको हो ।
नेपाली कांग्रेससँग छलफलका लागि प्रचण्डले अर्थमन्त्रीसमेत रहेका माओवादी नेता जनार्दन शर्मालाई खटाएका थिए । त्यस्तै एमालेसँग संवादका लागि प्रचण्डले नारायणकाजी श्रेष्ठ, वर्षमान पुन र देव गुरुङलाई खटाएका थिए । गुरुङ भने माओवादी महासचिव हुन्, सांसद होइनन् ।
