बुर्तिबाङ । बागलुङको ढोरपाटन नगरपालिकाले संघीय सरकारको ऋण तिर्न पाँच लाख बजेट विनियोजन गरेको छ । देशमा २६ खर्बभन्दा बढी ऋण रहेको अवस्थामा ढोरपाटनले ऋणमुक्त देश बनाउने अभियानका लागि पाँच लाख बजेट विनियोजन गरिएको हो ।
कार्यवाहक नगर प्रमुख धनबहादुर कायतले प्रस्तुत गरेको बजेटमा देशलाई ऋणमुक्त बनाउने अभियानका लागि ५ लाख विनियोजन गरिएको उल्लेख छ।
बिहीबार १७ औँ नगरसभाबाट पारित आर्थिक वर्ष २०८२ / ०८३ को नीति तथा कार्यक्रम एवं बजेटमा नगरपालिकाले सरकारी तथा गैरसरकारी संस्थालाई ऋणमुक्त देश बनाउने अभियानमा हातेमालो गर्न अपिल गरिएको छ । सरकारको पछिल्लो तथ्यांकअनुसार देशको कुल २६ खर्ब ५४ अर्ब ऋण छ । त्यसमध्ये १२ खर्ब ७२ अर्ब आन्तरिक र १३ खर्ब ८२ अर्ब बाह्य ऋण छ ।
