काठमाडौं । कतार फिफा विश्वकप फुटबल अन्तर्गत बुधबार राति भएको खेलमा अर्जेन्टिना अन्तिम १६ मा प्रवेश गरेको छ ।
स्टेडिय ९७४ मा भएको खेलमा पोल्याण्डलाई २-० गोल अन्तरले हराउँदै अर्जेन्टिनाले नकआउटमा स्थान सुरक्षित गरेको हो ।
अर्जेन्टिनाको जितमा एलेक्सिस म्याक एलिस्टर र जुलियन अल्भारेजले एक एक गोल गरे ।
खेलको ३९ औं मिनेटमा अर्जेन्टिनाका कप्तान लियोनल मेस्सी पेनाल्टीमा गोल गर्न चुकेका थिए । तर, ४६औं मिनेटमा एलिस्टरले गोल गर्दै अर्जेन्टिनालाई सुरुआती अग्रता दिलाए ।
त्यसपछि खेलको ६७ औं मिनेटमा अल्भारेजले गोल गर्दै अर्जेन्टिनालाई २-० गोलको जित दिलाए । जितसँगै अर्जेन्टिना समूह ‘सी’ को विजेता बन्दै नकआउट चरणमा पुगेको हो ।
पोल्याण्ड पनि समूह उपविजेता बन्दै नकआउट चरणमा पुगेको छ ।
अर्जेन्टिनाले ३ खेलमा ६ अंक जोडेको छ भने पोल्याण्डले ३ खेलमा ४ अंक जोड्न सफल भएको छ ।
