काठमाडौं । सभामुख डोलप्रसाद अर्यालले सांसद राजेन्द्रकुमार राईको अभिव्यक्ति संसद्को अभिलेखबाट हटाउने निर्देशन दिएका छन्।
प्रतिनिधि सभाको बुधबारको बैठकमा नेकपा (एमाले)का सांसद राईले ‘सभामुखले कान सुन्नुहुन्छ कि हुन्न’ भनेर प्रश्न गरेका थिए। त्यसपछि सभामुख अर्यालले सांसद राईलाई बोल्न रोकेका थिए।
केहीबेरको विवादपछि सभामुख अर्यालले सांसद राईलाई माफी माग्न भन्दै समय दिएका थिए। तर, राईले आफनो कुरा नै नसुनी सभामुखले गलत व्यवहार गरेको र यसबाट सभामुख अर्यालले पाँच वर्षसम्म संसद चलाउने ढाँचा नल्याउको भनि आलोचना गरेका थिए। त्यसपछि सभामुख अर्यालले संसद् बैठक १५ मिनेटका लागि स्थगित गरेका थिए।
त्यसपछि बसेको बैठकमा सभामुख अर्यालले सांसद राईलाई बोल्न समय दिएका थिए। सांसद राईले यसअघिको अभिव्यक्ति सभामुखले आफ्नो कुरा नसुनेर रोक लगाएकाले आवेशमा आएको बताएका थिए।
त्यसपछि सभामुख अर्यालले यसअघिको सांसद राईको अभिव्यक्ति संसदको रेकर्डबाट हटाउन निर्देशन दिएका थिए। सभामुख अर्यालले भने, ‘यसअघिको बैठकमा माननीय राजेन्द्रकुमार राईले बोलेका सम्पूर्ण अभिलेखहरू संसदीय रिकर्डबाट हटाउन निर्देशन गर्दछु।’
अहिले प्रतिनिधि सभाको बैठक सुचारु भएको छ। सांसदहरूले प्रतिनिधि सभाको बैठकमा आफ्नो भनाइ राखिरहेका छन्।
