काठमाडौं । काठमाडौं महानगरका पूर्वप्रमुख प्रशासकीय अधिकृत प्रदीप परियारसहित सातै जनाले भ्रष्टाचार मुद्दामा सफाई पाएका छन्।
मंगलबार विशेष अदालत, काठमाडौंले सातै जनालाई सफाइ दिएको हो। विशेष अदालतका न्यायाधीशहरू नारायणप्रसाद पौडेल, हेमन्त रावल र उमेश कोइरालाको संयुक्त इजलासले भ्रष्टाचार मुद्दामा सातै जनाले सफाई पाउने फैसला गरेको छ।
विशेष अदालतले भनेको छ, ‘विवेचित आधार कारणसहितबाट प्रतिवादीहरू प्रदिप परियार, रविमान श्रेष्ठ, शिवराज अधिकारी, वसन्त आचार्य, नमराज ढकाल, उत्तम दाहाल र जनार्दन गिरी उपरको आरोपदाबी पुष्टि हुन नसकेको हुँदा निज प्रतिवादीहरूले आरोप दाबीबाट सफाई पाउने ठहर्छ।’
उनीहरूविरुद्ध अख्तियार दुरुपयोग अनुसन्धान आयोगले गत जेठ २८ गते विशेष अदालतमा मुद्दा दायर गरेको थियो।
अख्तियारले काठमाडौं महानगरपालिकाको सामाखुसी कोरिडोरअन्तर्गत बसुन्धरादेखि म्हेपीसम्मको ढल निर्माण कार्यको ठेक्कामा अनियमितता भएको भन्दै परिसारसहित ७ जनाविरुद्ध विशेष अदालतमा मुद्दा दायर गरेको थियो। उनीहरूविरुद्ध ४ करोड ३१ लाख ७२ हजार २८७ रुपैयाँ बिगो माग गरिएको थियो।
