काठमाडौं । नेपाली कांग्रेसको इतर पक्ष नयाँ पार्टी गठन गर्ने निष्कर्षमा पुगेको छ । चुनदेवीस्थित सम्पर्क कार्यालयमा शुक्रबार बसेको पूर्वपदाधिकारी बैठकले एकताको सम्भावना क्षीण भएको भन्दै नयाँ पार्टी गठनका लागि तयारी गर्ने निष्कर्ष निकालेको हो ।
नेता मीन विश्वकर्माका अनुसार एकताको सम्भावना सभापति र उपसभापतिको तर्फबाट देखिएन । साउन महिनाभित्रै राष्ट्रिय भेला गर्ने भन्ने कुरा भयो । एकताको सम्भावना नरहेपछि राष्ट्रिय भेलाको एजेन्डा नै नयाँ पार्टी निर्माण गर्ने रहने उनको भनाइ छ ।
बैठकमा पूर्वकार्यवाहक सभापति पूर्णबहादुर खड्काले कहिले, कोसँग र कहाँ भेट भएको भन्नेबारेमा ब्रिफिङ गरेको नेता विश्वकर्माले बताए ।
पछिल्ला केही दिनयता कांग्रेस सभापति गगनकुमार थापाले कार्यवाहक सभापति खड्का र नेता सशांक कोइरालालाई भेटेका थिए । बैठकमा साउन ६ गते मनाउने बीपी स्मृति दिवसको तयारीका बारेमा पनि छलफल भएको थियो ।
