पूर्व श्रीमतीलाई अर्कै पुरुषसँग कोठामा देखेपछि हत्या

बुटवल । नेपाली सेनाका हवलदारले सम्बन्ध विच्छेद भएको दश दिनमा ​पूर्वश्रीमतीको हत्या गरेका छन् । दाङको तुलसीपुर उपमहानगरपालिका वडा नम्बर–६ राप्ती टोलमा डेरामा बस्ने ३१ वर्षीया टीका रावललाई शुक्रबार बिहान सेनाका हवलदार ३६ वर्षीय शालिकराम बुढाथोकीले धारिलो हतियार प्रयोग गरी हत्या गरेका हुन् ।​​ शालिकराम र टीकाले यही जेठ १४ गते जिल्ला अदालत सल्यानबाट सम्बन्ध विच्छेद गरेको खुलेको छ । जिल्ला प्रहरी कार्यालय दाङका प्रहरी नायब उपरीक्षक जनक मल्लले उनीहरू पूर्व दम्पती रहेको जानकारी दिए । हत्या गर्ने शालिकराम केही महिनाअघि मात्रै शान्ति मिसनबाट फर्किएका थिए । उनी ज्वालादल गण बारामा कार्यरत रहेको खुलेको छ । शुक्रबार बिहान साढे ८ बजेतिर टीका बस्ने कोठामा पुगेका बुढाथोकीले नेपाली सेनामा नै कार्यरत जवान आर्यन थापासँग बसेको देखेपछि दुवै जनालाई खुकुरी प्रहार गरेका थिए । अन्धाधुन्ध खुकुरी प्रहार गरेर उनी त्यहाँबाट भागेका थिए । भाग्ने क्रममा बुढाथोकीले प्रहार गरेको खुकरीले आर्यनको टाउको, हात र छातीमा चोट लागेको छ । आर्यनमाथि खुकुरी प्रहार भएपछि टीका कोठाबाट भागेर छिमेकीको घरमा लुकेकी थिइन् ।​​ शालिकरामले टीका लुकेको कोठामा पुगेर घाँटीलगायत शरीरका विभिन्न भागमा खुकुरी प्रहार गरी हत्या गरेर निस्किएका प्रहरीले जनाएको छ । प्रहरीका अनुसार २९ वर्षीय अर्याल अछाम जिल्लाको कमल बजार नगरपालिका–४ घर भइ हाल तुलसीपुरको १९ नम्बर बाहिनीमा कार्यरत जवान हुन् ।​​ शालिकरामले शुरूमा आर्यनलाई खुकुरी प्रहार गरेका प्रहरीको अनुसन्धानबाट खुलेको छ । आर्यनको अवस्था खतरामुक्त रहेको डीएसपी मल्लले जानकारी दिए ।​​ आर्यनको प्रादेशिक अस्पताल तुलसीपुरमा उपचार भइरहेको छ । महिलाको हत्या गरेपछि उनी खुकुरी लिएर हिँडिरहेको अवस्थामा प्रहरीले उच्च अदालत तुलसीपुर नजिकबाट पक्राउ गरेको हो । प्रहरीका अनुसार उनले टीकाको हत्या गरेको स्वीकार गरिसकेका छन् । शालिकराम र टीकाको सात वर्षीय छोरा रहेको बताइएको छ ।