काठमाडौं । एसएमएस फ्रेन्डशिप कप अन्तर्गत शुक्रबार भएको खेलमा नेपाल बरोदासँग ३७ रनले पराजित भएको छ।
गुजरातमा जारी टी-२० प्रतियोगितामा बरोदाले दिएको १५७ रनको लक्ष्य पछ्याउने क्रममा नेपाल १८.५ ओभरमा ११९ रनमै समेटिएको हो। नेपालका लागि सन्दीप जोराले ५६ रन बनाए। उनले ४३ बलमा चार छक्का र तीन चौका प्रहार गरे।
त्यस्तै, विवेक यादवले १७ र कुशल भुर्तेलले १६ रन बनाए। अन्य खेलाडीले दोहोरो अंक पनि जोड्न सकेनन्। बरोदाका लागि ध्रुव पटेलले चार विकेट लिए। त्यस्तै, लक्षित टोक्सियाले तीन, जय आभालेले दुई र हेमन्त पुण्डेले एक विकेट लिए।
यसअघि ब्याटिङ गरेको बरोदाले आठ विकेटको क्षतिमा १५६ रन बनाएको थियो। बरोदाका लागि शाश्वत रावतले ३१, ध्रुव पटेलले २९, अमित पासीले २६, मोहित मोङ्गियाले २० र अभिमन्यु सिंह राजपुतले ११ रन बनाए।
नेपालका लागि करन केसी र गुलशन झाले दुई-दुई विकेट लिए भने आकाश चन्द, प्रतीश जिसी, ललित राजवंशी र दीपेन्द्र सिंह ऐरीले एक-एक विकेट लिएका थिए।
नेपाल यसअघि नै फाइनलमा पुगिसकेको छ। त्यस्तै, गुजरात पनि फाइनलमा पुगेको छ।
नेपाल बरोदासँग ३७ रनले पराजित
एसएमएस फ्रेन्डशिप कप अन्तर्गत शुक्रबार भएको खेलमा नेपाल बरोदासँग ३७ रनले पराजित भएको छ।

