गण्डकीका मुख्यमन्त्री पाण्डेले आज राजीनामा दिने

काठमाडौं । अल्पमतमा परेका गण्डकी प्रदेशका मुख्यमन्त्री सुरेन्द्रराज पाण्डे राजीनामा दिने तयारी गरेका छन् । मुख्यमन्त्री पाण्डेले बुधवार (आज) राजीनामा दिने तयारी गरेको उनका प्रेस संयोजक नरहरि सापकोटाले जानकारी दिए । केन्द्रमा गठबन्धन फेरिएपछि त्यसको प्रभावले माओवादी केन्द्रले फागुन २३ गते मुख्यमन्त्रीलाई दिएको समर्थन फिर्ता लिएपछि नेपाली कांग्रेसका संसदीय दलका नेता पाण्डे नेतृत्वको सरकार अल्पमतमा परेको थियो । राजीनामाबारे छलफल गर्न मुख्यमन्त्रीले मंगलवार कांग्रेस संसदीय दलको बैठक राखेका थिए । बैठकपछि मुख्यमन्त्रीले राजीनामा दिने विषय सार्वजनिक भएको हो । आफ्नो सरकार जोगाउन एक महिनाभित्र मुख्यमन्त्रीले सदनबाट विश्वासको मत लिनुपथ्र्यो । तर, पाण्डेले आफ्नो सरकार जोगाउनलाई नयाँ नीति अपनाएको विश्लेषण गरिएको छ । किनकि, गण्डकीमा राष्ट्रिय प्रजातन्त्र पार्टी (राप्रपा)ले साथ नदिएसम्म नयाँ गठबन्धनलाई बहुमत पुग्ने अवस्था छैन । यस्तोमा प्रदेश प्रमुखले पुनः ठूलो दल कांग्रेसलाई नै सरकार बनाउन आह्वान गर्ने र फेरि आफ्नै सरकार बन्न सक्ने आकलन पाण्डेको छ ।