जन्मदिनमा विपन्न परिवारलाई खाद्यान्न र नगद सहयोग

गलकोट । सामाजिक संस्था घुम्टे युवा परिवार जापान शाखाका उपाध्यक्षसमेत रहेका बागलुङका युवा दुर्गा थापाले पत्नी र छोराको जन्मदिनको अवसरमा विपन्न परिवारलाई खाद्यान्न सहयोग गरेका छन्। गलकोट नगरपालिका ७ घर भई हाल जापानमा कर्म गर्दै आएका समाजसेवी थापाले श्रीमती सकुन केसी थापा र छोरा बिनम्र थापाको जन्मदिनको अवसरमा गलकोट नगरपालिका वडा नं ९ बाँसखोला, चित्रेथुम निवासी पुतली विश्वकर्माको परिवारलाई ८५ हजारको खाद्यान्न र नगद रु ५ हजार सहयोग गरेका हुन्। विश्वकर्माको परिवारलाई एक कार्यक्रमकाबीच सहयोगी दुर्गा थापा र गलकोट नगरपालिका वडा नं ९ का वडाध्यक्ष तेज बहादुर थापाले संयुक्त रुपमा नगद र खाद्यान्न हस्तान्तरण गरे। विश्वकर्माको परिवारमा शारीरिक रुपमा अशक्त बालबच्चा र पाका उमेरका गरि १० जना छन्। आर्थिक अवस्था निकै कमजोर रहेका विश्वकर्मा परिवारको जग्गा जमिन पनि पर्याप्त छैन। उनीहरुले दैनिक ज्याला मजदुरी गरेर जिवीकोपार्जन गर्दै आएका वडाध्यक्ष थापाले बताए।