उदयपुरमा अज्ञात रोगबाट १८ माउबाख्रा मरे

काठमाडौं । अज्ञात रोगका कारण उदयपुरको सदरमुकाम गाईघाटमा एकै घरका १८ माउबाख्रा एकै पटक मरेका छन् । जिल्लाको सदरमुकाम समेत रहेको त्रियुगा नगरपालिका वडा नम्बर १० बोक्से स्थित आदर्श टोलका हिमचुली कृषि उद्यम केन्द्रका सञ्चालक कृषक प्रेम बहादुर खड्काले पालेका १८ माउबाख्रा एकै पटक मरेका हुन । अज्ञात रोगका कारण कृषक खड्काको गोठ नै रित्तिने गरि १८ माउबाख्रा एकै पटक मरेको वडा नम्बर १० का वडा अध्यक्ष किरण पाण्डेले बताए । मंगलबार बिहान एकै पटक ९ वटा बाख्रा मरेको भन्दै कृषकले बोलाएपछि कृषकको घरमा पुगेका वडा अध्यक्षले कृषकको घरबाट नै पशु प्राविधिकलाई खबर गरेका थिए । मंगलबार आफैँले पशु प्राविधिकलाई कृषकको घरमा पठाइदिए पनि उपचार गर्दा गर्दै मंगलबार साँझ सम्म १८ वटा बाख्रा मरेको वडा अध्यक्षको भनाई छ । सोमबार राती आफूले पालेका बाख्रामा अचानक समस्या देखिएको र ९ वटा बाख्रा एकै पटक मरेको कृषक खडकाले बताए । उपचार गर्दा गर्दै मंगलबार साँझ सम्ममा १८ वटा बाख्रा एकै पटक मरेपछि कृषक खड्कालाई ठूलो आर्थिक नोक्सानी भएको छ । सुविधा सम्पन्न पशु प्राविधिक र औषधि उपलब्ध हुने स्थानमै २४ घण्टा भित्रै १८ वटा माउबाख्रा मर्नु गम्भीर अवस्था रहेको स्थानीय कृषकको भनाई छ ।