एसियाकै लामो मानिएको बागलुङको झोलुङ्गे पुलबाट हामफालेर २२ वर्षीय युवाले गरे आत्महत्या

बागलुङ । बागलुङमा झोलुङ्गे पुलबाट हाम फालेर एक जनाले आत्महत्या गरेका छन् । एसियाकै लामो मानिने बागलुङको बाङ्गेचौर र पर्वतको पाङ जोड्ने गरि कालीगण्डकी नदिमाथि निर्माण भएको झोलुङ्गे पुलबाट हामफाल्दा बागलुङ नगरपालिका–४ रातमाटाका २२ वर्षीय शेरबहादुर थापाका मृत्यु भएको प्रहरीले जनाएको छ । बुधबार साँझ ५ः४५ बजे पुलबाट एक्कासी कालीगण्डकी नदिमा हाम फालेको प्रत्यक्षदर्शीलाई उद्धृत गर्दै जिल्ला प्रहरी कार्यालय बागलुङका प्रहरी निरीक्षक दिपकबाबु केसीले भने, 'उहाँमा मानसिक समस्या रहेछ । उहाँको बुबा पनि घटनास्थलमा आउनुभएको छ ।' खबर पाए लगत्तै जिल्ला प्रहरी कार्यालयबाट प्रहरी टोली कालीगण्डकी किनारमा पुग्दा थापाको मृत्यु भइ सकेको प्रहरी निरीक्षक केसीको भनाइ छ ।