राप्रपा राष्ट्रियसभाको चुनावमा सहभागी हुने

काठमाडौं । राष्ट्रिय प्रजातन्त्र पार्टी (राप्रपा) राष्ट्रियसभाको चुनावमा सहभागी हुने भएको छ । आज बिहीवार बसेको केन्द्रीय कार्यसम्पादन समितिको बैठकले आउँदो माघ ११ गते हुने राष्ट्रियसभाको चुनावमा सहभागी हुने निर्णय गरेको पार्टीका प्रवक्ता एवम् प्रचार विभाग प्रमुख मोहनकुमार श्रेष्ठले जानकारी दिए । यसका लागि अन्य दलसँग आवश्यक सहयोग जुटाउन संवाद गर्न पार्टीको राजनीतिक विभाग प्रमुख वरिष्ठ नेता उपाध्यक्ष बुद्धिमान तामाङलाई जिम्मेवारी दिने निर्णय गरेको प्रवक्ता श्रेष्ठले बताए । यस्तै बैठकले आउँदो पुस २७ गते पृथ्वी जयन्ती तथा राष्ट्रिय एकता दिवसलाई केन्द्रीय तहसहित पार्टीको सबै तहमा उत्सवका रूपमा मनाउने निर्णय गरेको छ । बैठकले पार्टीको नियमावली–२०८० लाई विधान मस्यौदा समितिमा पठाई रायसहित केन्द्रीय कार्यसमितिको बैठकमा पेस गर्ने निर्णय पनि गरेको छ । राप्रपाको केन्द्रीय कार्यसमितिको बैठक आउँदो पुस १, २ र ३ गते काठमाडौंमा बस्ने छ । प्रवक्ता श्रेष्ठका अनुसार बैठकले इलाममा हुने प्रतिनिधिसभाको उपचुनावमा पार्टीको तर्फबाट आवश्यक तयारी, समन्वय र सहजीकरण गर्न उपाध्यक्ष हेमजङ गुरुङलाई जिम्मेवारी दिने निर्णय गरेको छ ।