काठमाडौं । देशभर मौसम बदली र वर्षा हुने क्रम जारी छ। आज बिहान पनि सबै प्रदेशमा पानी परिरहेको मौसमविद्ले बताएका छन् । ‘अहिले लुम्बिनी र गण्डकीमा धेरै वर्षा भइरहेको छ’, महाशाखाकी मौसमविद् प्रतिभा मानन्धरले भनिन्, ‘देशका बाँकी प्रदेशका पनि केही स्थानमा हल्कादेखि मध्यम वर्षा भइरहेको छ।’
उनका अनुसार बागमती प्रदेशका केही स्थानमा वर्षा भइरहेको भए पनि यसअन्तर्गत यतिबेला काठमाडौं उपत्यकामा भने पानी परेको छैन। ‘तर मौसम पूर्णतया बदली (आकाशभरि बादल) छ’, उनले भनिन्, ‘उपत्यकामा तत्कालै वर्षाको सम्भावना नदेखिए पनि दिउँसोसम्ममा वर्षा हुन्छ।’
मौसम महाशाखाले आज बिहान ६ बजे जारी गरेको विशेष मौसम पूर्वानुमान बुलेटिनअनुसार दिउँसो तथा राति देशभर वर्षा हुने सम्भावना छ। केही प्रदेशमा भारी वर्षा हुने सम्भावना छ भने तराईमा हावाहुरीसमेत आउने सम्भावना छ।
बुलेटिनअनुसार आज दिउँसो गण्डकी, लुम्बिनी , कर्णाली र सुदूरपश्चिम प्रदेशका धेरै स्थान तथा बाँकी प्रदेशका केही ठाउँमा हल्कादेखि मध्यम वर्षाको सम्भावना छ। साथै गण्डकी, लुम्बिनी र सुदूरपश्चिम प्रदेशका एकरदुई स्थानमा मेघगर्जनरचट्याङसहित भारी वर्षाको समेत सम्भावना छ। गण्डकी, लुम्बिनी र सुदूरपश्चिम प्रदेशका तराईका धेरै तथा बाँकी प्रदेशका तराईका थोरै स्थानमा हावाहुरीको समेत सम्भावना छ।
महाशाखाको बुलेटिनअनुसार राति पनि कोशी, मधेश प्रदेश, लुम्बिनी र सुदूरपश्चिम प्रदेशका केही स्थान तथा बाँकी प्रदेशका थोरै ठाउँमा हल्कादेखि मध्यम वर्षाको सम्भावना छ। साथै लुम्बिनी र सुदुर पश्चिम प्रदेशका एक दुई स्थानमा मेघगर्जनचट्याङसहित भारी वर्षाको समेत सम्भावना छ।
मौसम महाशाखाले आगामी २४ घण्टा (आइतबार बिहान ६ बजेसम्म) का लागि चेतावनी तथा परामर्श पनि जारी गरेको छ।
जसमा भनिएको छ– ‘देशका धेरै स्थानमा हल्कादेखि मध्यम वर्षाको सम्भावना छ। साथै गण्डकी, लुम्बिनी र सुदूरपश्चिम प्रदेशका एकरदुई स्थानमा मेघगर्जनचट्याङसहित भारी वर्षाको समेत सम्भावना छ। गण्डकी, लुम्बिनी र सुदूरपश्चिम प्रदेशका तराईका धेरै तथा बाँकी प्रदेशका तराईका थोरै स्थानमा हावाहुरीको समेत सम्भावना रहेकाले सडक तथा हवाई यातायात, स्वास्थ्य, कृषि, पर्यटन लगायतका क्षेत्रहरू प्रभावित हुनसक्ने देखिन्छ। तसर्थ भारी वर्षा, मेघगर्जन चट्याङ, हावाहुरी, गेग्रान बहाव, बाढी, पहिरो तथा भूक्षयका कारण हुनसक्ने जोखिम वा क्षतिबाट बच्न आवश्यक सतर्कता अपनाउन हुन अनुरोध छ।
मौसम पूर्वानुमानले निकाल्यो विशेष बुलेटिन, २४ घण्टालाई चेतावनी
आज बिहान पनि सबै प्रदेशमा पानी परिरहेको मौसमविद्ले बताएका छन् । ‘अहिले लुम्बिनी र गण्डकीमा धेरै वर्षा भइरहेको छ’, महाशाखाकी मौसमविद् प्रतिभा मानन्धरले भनिन्, ‘देशका बाँकी प्रदेशका पनि केही स्थानमा हल्कादेखि मध्यम वर्षा भइरहेको छ।’
