बजेट पास गर्न सहयोग माग्दै जसपाको बैठकमै पुगे प्रधानमन्त्री

काठमाडौं । जनता समाजवादी पार्टी (जसपा)का सांसदहरू बजेटको विपक्षमा उभिने तयारी गरिरहँदा प्रधानमन्त्री पुष्पकमल दाहाल जसपाको संसदीय दलको बैठकमै उपस्थित भएर सांसदहरूलाई बजेटको पक्षमा मतदान गर्न आग्रह गरेका छन् । जसपाका १२ सांसदमध्ये ७ जना सांसदले विपक्षमा मतदान गर्ने अडान राखेपछि बुधबार संसद भवनस्थित शंकर हलमा बसेको जसपा संसदीय दलको बैठकमै प्रधानमन्त्री दाहाल पुगेर बजेट पास गराउन सहयोग मागेका हुन् । यस क्रममा प्रधानमन्त्री दाहालले जसपाका सांसदहरूलाई उनीहरूले भनेबमोजिम बजेट विनियोजन गरिदिने आश्वासनसमेत दिएका थिए । म प्रधानमन्त्रीले नै बोलें, तपाईँहरूको माग पूरा गर्ने जिम्मा मेरो भयो । अहिले बजेट पास गर्न सहयोग गरिदिनुस्, प्रधानमन्त्री दाहाललाई उद्धृत गर्दै जसपाका एक सांसदले बताए । जसपाका सांसदहरूले अध्यक्ष उपेन्द्र यादवको आग्रह अस्वीकार गर्दै आएपछि अन्ततस् अध्यक्ष यादवको आग्रहमा प्रधानमन्त्री दाहाल नै बैठकमा गएर आश्वासन दिनुपरेको थियो । दाहाल नेतृत्वको सरकारले आगामी आर्थिक वर्षको बजेट पास गर्ने तयारी गरिरहँदा जसपाका सांसदहरू भने दुई पक्षमा विभाजित भएका थिए । उनीहरूको बुधबारको बैठक २ घण्टा चल्दा पनि सहमति हुन नसकेपछि प्रधानमन्त्री दाहालले बजेट पासका लागि सहमति मागेका हुन् ।