काठमाडौं । वैदेशिक अध्ययनका लागि चाहिने ‘नो अब्जेक्सन लेटर’ (एनओसी) अब अनलाइनबाटै पाइने भएको छ । सोमबार शिक्षा, विज्ञान तथा प्रविधि मन्त्री अशोक राईले सो कुराको शुभारम्भ गरेका छन् ।
एनओसी लिन चाहने विद्यार्थीले अनलाइनमा निवेदन भर्नुपर्ने हुन्छ । विद्यार्थीले राष्ट्रिय परीक्षा बोर्ड र विश्वविद्यालयको शैक्षिक प्रमाणपत्र, अफर लेटर र योग्यतालगायतका विषय अनलाइनबाटै पेश गर्नुपर्ने हुन्छ ।
एनओसीका लागि बुझाउनुपर्ने दस्तुर बैंकबाटै बुझाउने र भौचर पनि अनलाइनबाट पेश गर्नुपर्ने व्यवस्था गरिएको छ । विद्यार्थीले पेश गरेको निवेदन विभिन्न युनिटले अनलाइनबाटै हेर्ने सहसचिव बासुदेव वस्तीले न्यूज खरीलाई जानकारी दिए ।
उनका अनुसार निवेदकले आफू बसेको स्थानबाटै विद्युतीय प्रविधिबाट आवश्यक कागजात अपलोड गर्न सक्ने छन् र उक्त विवरण रुजु गरी सो को विवरण तत्काल एसएमएस मार्फत सूचीत गरिनेछ । साथै सम्पूर्ण प्रक्रिया पूरा भएपछि अनलाइनमै एनओसी उपलब्ध हुने भएको छ ।
वार्षिक ६५ हजार विद्यार्थीले नो अब्जेक्सन लेटर (एनओसी) लिएको मन्त्रालयको तंथ्याकले देखाउँछ ।



