काठमाडौं । नुवाकोटको बेत्रावतीमा बाढी गएको ११ औं दिनमा शनिबार जीवितै उद्धार गरिएकी ६४ वर्षीया चण्डिका श्रेष्ठका परिवारले उनको काजकिरिया थालिसकेको थियो ।
दुई पटकसम्म खोजी गर्दा पनि नभेटिएपछि चण्डिकाको विष्णुमति नदी किनारको बिजेश्वरीमा कुशको शव बनाएर अन्तिम संस्कार गरिएको उनका सम्धी रमेशमान श्रेष्ठले जानकारी दिए ।
कुशको शव बनाएर अन्तिम संस्कार गरेपछि सानोभर्याङस्थित घरमा चण्डिकाको काजकिरिया थालिएको थियो । काजकिरियाको काम चलिरहेकै बेला शनिबार उनको बेत्रावतीबाट जीवितै उद्धार गरिएको छ । नेपाल प्रहरी र सशस्त्र प्रहरीको टोलीलाई उनलाई शनिबार दिउँसो चारतले घरभित्र पुरिएको अवस्थामा जीवितै उद्धार गरेको हो ।
अहिले उनको छाउनीस्थित वीरेन्द्र सैनिक अस्पतालमा उपचार चलिरहेको छ । परीक्षण र उपचार चलेकाले सेनाले उनका आफन्तलाई चण्डिकासँग भेट गर्न दिएको छैन ।
उनको अवस्था मध्यम रहेको र बोल्न सक्ने अवस्थामा रहेको प्रहरीले जनाएको छ । विदुर नगरपालिका–१० बेत्रावती निवासी आनन्दलाल श्रेष्ठकी श्रीमती चण्डिकालाई शनिबार नेपाल प्रहरी र सशस्त्र प्रहरीले घरको भग्नावशेषबाट जीवितै उद्धार गरेको गरेका थिए । उद्धारलगत्तै उनलाई सेनाको हेलिकोप्टरमार्फत् उपचारका लागि काठमाडौं पुर्याइएको हो ।
प्रहरी निरीक्षक महेन्द्र दर्नालको कमान्डमा खटिएको टोलीले बेत्रावतीस्थित नदीको बगर तथा क्षतिग्रस्त संरचनामा खोजी गरिरहेको थियो । सोही क्रममा आनन्दलाल श्रेष्ठको चारतले घरको छतमा पुगेपछि प्रहरीले घरभित्रबाट आवाज सुनेको थियो ।
प्रहरी निरीक्षक दर्नालका अनुसार पर्खालमा सानो प्वाल बनाएर खोजी गर्दा भित्रबाट ‘बचाउ–बचाउ’ भन्ने आवाज सुनिएको थियो । त्यसपछि पर्खाल फुटाएर श्रेष्ठको उद्धार गरिएको हो ।
