सर्लाहीमा स्कारपियोको ठक्करबाट दुईको मृत्यु, एक घाइते

काठमाडौं । सर्लाहीमा भारतीय नम्बरको स्कारपियोले मोटरसाइकललाई ठक्कर दिँदा दुई जनाको मृत्यु भएको छ भने एक जना घाइते भएका छन्। शुक्रबार राति करिब ८ बजे ब्रहम्पुरी गाउँपालिका–५ स्थित हुलाकी सडकखण्डमा पर्साबाट भेल्हीतर्फ जाँदै गरेको भारतीय नम्बर प्लेट एमएच ०४ डीजे १२९७ को स्कारपियोले विपरीत दिशाबाट आउँदै गरेको प्र.३–०३–००१ प ७५७५ नम्बरको मोटरसाइकललाई ठक्कर दिएको जिल्ला प्रहरी कार्यालय सर्लाहीले जनाएको छ। दुर्घटनामा परेर ब्रहम्पुरी–२ का २३ वर्षीय अंकित चौधरी र २५ वर्षीय रोहित सहनीको उपचारका क्रममा मृत्यु भएको प्रहरी प्रवक्ता प्रहरी नायब उपरीक्षक सरोज राईले जानकारी दिए। त्यस्तै, २३ वर्षीय शिवशंकर पण्डितको बारा स्थित न्युरो अस्पतालमा उपचार भइरहेको र उनको अवस्था मध्यम रहेको प्रहरीले जनाएको छ। दुर्घटनामा संलग्न स्कारपियो र मोटरसाइकल प्रहरी नियन्त्रणमा रहेका छन् भने स्कारपियो चालक फरार भएकाले खोजीकार्य भइरहेको जिल्ला प्रहरी कार्यालय सर्लाहीले जनाएको छ।