सन्दीप आज जेलबाट छुट्दै

काठमाडौं ।  उच्च अदालत, पाटनले बलात्कार आरोपी क्रिकेटर सन्दीप लामिछानेलाई २० लाख रुपैयाँ धरौटीमा छाड्न आदेश दिएको छ । न्यायाधीश ध्रुवराज नन्द र रमेश ढकालको इजलासले पुर्पक्षका लागि थुनामा पठाउने जिल्ला अदालत, काठमाडौंको आदेश बदर गर्दै धरौटीमा छाड्न आदेश दिएको हो । आदेशसँगै लामिछाने आज छुट्ने भएका हुन् । लामिछानेका वकिल सरोजकृष्ण घिमिरेका अनुसार नगद वा बैंक जमानत राख्नुपर्ने भएकाले शुक्रबार  मात्र उनी छुट्नेछन् । धरौटी जम्मा गराएर जिल्ला अदालत, काठमाडौं हुँदै आदेशसहितको पत्र आएपछि लामिछानेलाई शुक्रबार छाडिने डिल्लीबजार कारागारका जेलर लक्ष्मीप्रसाद बाँस्कोटाले बताए ।