काठमाडौं । राष्ट्रपतिको निर्वाचनका लागि निर्णायक रहेका नेकपा (माओवादी केन्द्र), एकीकृत समाजवादी र जसपाको बैठक शुरू भएको छ ।
एकीकृत समाजवादी र जसपालाई पनि साथ लिएर अगाडि बढ्ने रणनीतिमा रहेका प्रधानमन्त्री पुष्पकमल दाहालको आह्वानमा तीन दलको बैठक बसेको हो ।
सिंहदरबारमा बसेको बैठकमा प्रधानमन्त्री प्रचण्ड, एकीकृत समाजवादीका अध्यक्ष माधव नेपाल र जसपा अध्यक्ष उपेन्द्र यादव सहभागी छन् ।
यसका अलावा माओवादीबाट नारायणकाजी श्रेष्ठ, जनार्दन शर्मा र शक्ति बस्नेत, एकीकृत समाजवादीबाट बेदुराम भुसाल, घनश्याम भुसाल र प्रकाश ज्वाला तथा जसपाबाट राजेन्द्र श्रेष्ठ समेत सहभागी छन् ।
चुनावअघिको पुरानै गठबन्धन ब्युँताउने प्रयास भइरहेका बेला तीन दलको बैठकलाई अर्थपूर्ण रूपमा हेरिएको छ ।प्रधानमन्त्रीको प्रयासअनुसार माओवादी, जसपा र एकीकृत समाजवादीबीच मोर्चाबन्दी हुनसके राष्ट्रपति निर्वाचन र त्यसपछि पनि यो मोर्चा निर्णायक शक्तिका रूपमा रहनेछ ।
