मुस्ताङ । मुस्ताङको थासाङ गाउँपालिका–३ धम्पु सडकमा बस दुर्घटनामा गम्भीर घाइते भएका १० जनालाई पोखरा रिफर गरिएको छ। बसमा सवार २ भारतीय नागरिकसहित १० जनालाई थप उपचारका लागि पोखरा पोखरा पठाइएको प्रहरी नायव उपरिक्षक(डीएसपी) रविन्द्रनाथ पौडेलले जानकारी दिए।
उनका अनुसार म्याग्दी कोरला यातायातको ना ७ ख ७४४० नम्बरको बस बुधबार बिहान ८ः३० बजे बेनी–जोमसोम सडकबाट कालिगण्डकी नदीमा खसेको हो। दुर्घटनामा बिमती परियार, शर्मिला परियार, लक्ष्मी परियार, सुनिल परियार, राजकुमार बुढाथोकी, उमेश सापकोटा, पेमा छेतेन बिक, सुग्रिब परियार (नाबालक) र भारतीय नागरिक सुनिल पटेल, अपिता गोगय गम्भीर घाइते भएका हुन्। सामान्य घाइते भएका ७ जनालाई लेते प्राथमिक स्वास्थ्य केन्द्रमा उपचार गरिएको छ। उनीहरुमध्ये ३ जना यात्रुलाई पोखरा लैजाने तयारी भइरहेको प्रहरीले जनाएको छ।
बसमा १२ जना पुरुष, ४ जना महिला र १ जना नाबालक यात्रु सवार थिए। बस दुर्घटनाको जानकारी पाएपछि जिल्ला प्रहरी कार्यालय र लेते प्रहरी चौकीबाट प्रहरी टोली र स्थानीयबासी उद्दारमा खटिएका थिए। बस दुर्घटना कसरी भयो भन्ने भन्ने विषयमा अनुसन्धान भइरहेको प्रहरी निरीक्षक राजकुमार तामाङले जानकारी दिए।
