काठमाडौं । नेपाली कांग्रेसका सभापति गगनकुमार थापाले कानुनमा सुधार नभएसम्म नेपालको पूर्वाधार निर्माणमा देखिएको समस्या समाधान गर्न नसकिने बताएका छन् । कांग्रेसले भावी प्रधानमन्त्रीको रूपमा अगाडि सारेका थापाले पूर्वाधार निर्माणमा आफ्नो योजनाबारे जानकारी दिन सामाजिक सञ्जालमा सार्वजनिक गरेको भिडियोमा यस्तो बताएका हुन् ।
थापाले विगतदेखि नै पूर्वाधार निर्माणमा देखिएको समस्याबारे बोल्दै र समाधानका लागि काम गर्दै आएको, तर अब त्यतिले मात्रै पर्याप्त नहुने जानकारी दिँदै आफ्नो योजना सार्वजनिक गरेका छन् । जसमा उनले कानुनमा सुधार गर्नुपर्ने विषयलाई जोड दिएका छन् ।
उनले कानुनमा सुधार, सम्बन्धित निकायमा सुशासन, स्रोतको व्यवस्थापन, नयाँ मोडलको सुरुवात, निजीक्षेत्रसँग सहकार्य र अनुगमनबाट मात्रै पूर्वाधार निर्माणमा देखिएको समस्या समाधान गर्न सकिने बताए । यी कुरामा काम गर्न सकेमा आउने पाँच वर्षमा रूपान्तकारी काम गर्न सकिने दाबी गरे ।
