काठमाडौं । काठमाडौंको माइतीघर मण्डलामा प्रदर्शनमा उत्रिएका जेनजी अगुवासहितलाई प्रहरीले नियन्त्रणमा लिएको छ । स्थानीय प्रशासनबाट अनुमति नलिई प्रदर्शनमा उत्रिएपछि उनीहरुलाई प्रहरीले नियन्त्रणमा लिएको हो ।
प्रदर्शनमा उत्रिएका निकोलस भुसाल, जेनजी अगुवा मिराज ढुंगानासहित केही जेनजीलाई प्रहरीले नियन्त्रणमा लिएको हो । यसअघि नियन्त्रणमा लिएर छाडे पनि पुनः प्रहरीले उनलाई नियन्त्रणमा लिएको हो ।
प्रहरीले मिराज, रविकिरण हमाल, अजय सोडारीलगायत जेनजीलाई नियन्त्रणमा लिएर प्रहरीको गाडीमा राखिएको छ । तर, यता जेनजीहरुले भने आफूहरुले सामूहिक गिरफ्तारी दिएको जनाएका छन् ।
प्रधानमन्त्री सुशीला कार्कीको राजीनामा, सर्वपक्षीय सरकार गठनसहितको माग राखेर उनीहरु प्रदर्शनमा उत्रिएका हुन् । तर, उनीहरुलाई प्रदर्शन गर्न जिल्ला प्रशासन कार्यालय काठमाडौंले अनुमति दिएको थिएन ।
