काठमाडौं । नेकपा एमालेले आज सरकारविरुद्ध काठमाडौंमा जनसभा आयोजना गरेको छ। जनसभामा सहभागी हुन एमालेका नेता कार्यकर्ता काठमाडौंमा छन्। भृकुटीमण्डपमा हुने सभाअघि एमालेले र्याली निकालेको छ। काठमाडौं उपत्यकाका विभिन्न क्षेत्रबाट निस्किएको र्यालीका कारण यहाँको ट्राफिक व्यवस्था व्यापक रूपमा प्रभावित भएको छ।
प्रदर्शनीमार्ग क्षेत्रमा भीड बढेपछि त्यहाँ हुँदै सञ्चालन हुने सवारी साधनलाई पद्मोदय मोड र सभागृह मोडतर्फ डाइभर्सन गरिएको काठमाडौं उपत्यका ट्राफिक प्रहरी कार्यालयले जनाएको छ।
एमालेको र्यालीका कारण टुँडिखेल आसपासको सडकमा समेत सवारी आवागमन अवरुद्ध बनेको प्रहरीले बताएको छ। सहज यात्राका लागि वैकल्पिक सडक मार्ग प्रयोग गर्न सर्वसाधारणलाई आग्रह गरिएको छ।
यसबाहेक माइतीघर चोकबाट सर्भिस लेन हुँदै थापाथलीतर्फ जाने सवारीलाई मुख्य लेनबाट लैजान निर्देशन दिइएको छ। सामाखुसी चोक र चावहिल चोकमा पनि भीड बढेकाले ती क्षेत्रमा समेत सवारी आवागमन प्रभावित बनेको ट्राफिक प्रहरीले जनाएको छ।
