काठमाडौं । मधेश प्रदेशमा सभामुख रामचन्द्र मण्डल पदमुक्त भएका छन् । उनीविरूद्ध दर्ता भएको अविश्वास प्रस्ताव दुई तिहाइ बहुतले पारित भएसँगै मण्डल पदमुक्त भएका हुन् । बुधबार बसेको प्रदेशसभा बैठकले अविश्वासको प्रस्ताव पारित गरेको हो ।
बैठकमा ७८ जना प्रदेशसभा सदस्य सदस्य उपस्थित थिए । जसमध्ये सभामुखले पद अनुकूल आचरण प्रस्तुत नगरेको भन्ने प्रस्तावको पक्षमा ७६ मत खसेको छ भने विपक्षमा शून्य मत खसेको छ ।
‘सभामुखले पद अनुकूल आचरण नगरेको भन्ने प्रस्ताव पेस गर्ने प्रस्तावकहरूको तर्फबाट मा० कुमर कान्त झाले पेस गरेको प्रस्ताव प्रदेशसभा कार्य सञ्चालन नियमावली, २०७५ को नियम १८० बमोजिमको प्रस्ताव सोही नियमावलीको नियम १८२ को उपनियम (४) बमोजिम सभाको दुई तिहाई बहुमतबाट पारित भई नेपालको संविधानको धारा १८२ को उपधारा (६) को खण्ड (ग) र नियमावलीको नियम १८२ को उपनियम (४) बमोजिम मा० सभामुख श्री रामचन्द्र मण्डल स्वतः पद मुक्त भएको घोषणा प्रदेशसभामा भएको व्यहोरा जानकारीको लागि अनुरोध छ’, प्रदेशसभा सचिव बासु प्रसाद कोइरालाले जारी गरेको सूचनामा भनिएको छ ।
सात दलीय गठबन्धनका ६४ जना प्रदेश सांसदहरूले कात्तिक २७ गते प्रस्ताव दर्ता गराएका थिए । उक्त प्रस्ताव पारित भएसँगै प्रदेशसभा बैठक भोलि बिहीबार दिउँसो १ बजे बस्नेगरि स्थगित भएको छ।
