काठमाडौं । नेकपा (एमाले) को दोस्रो विधान महाधिवेशन शुक्रबारबाट ललितपुरमा सुरु भएको छ । ‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य’ भन्ने मूल नारासहित सुरु भएको महाधिवेशनको पार्टी अध्यक्ष एवं प्रधानमन्त्री केपी शर्मा ओलीले उद्घाटन गरेका छन् ।
तीन दिनसम्म चल्ने महाधिवेशनमा राजनीतिक प्रतिवेदनसहित विभिन्न दस्ताबेज र विधान संशोधन प्रस्तावमाथि छलफल गरी पारित गरिने एमाले प्रमुख प्रचार विभाग प्रमुख राजेन्द्र गौतमले जानकारी दिए । विभिन्न प्रतिवेदनमाथि शनिबारसम्म समूहगतरूपमा छलफल हुने उनको भनाइ छ ।
आइतबार समूहगतरूपमा सामूहिक निष्कर्ष प्रस्तुत हुने र अध्यक्षले जवाफ दिने गौतमले बताए । अध्यक्षले दिएको जवाफमाथि कसैको भिन्न मत भए वा फरक मतमाथि निर्णयको माग गरे निर्णयार्थ प्रस्तुत गरिने उनले बताए ।
महाधिवेशनमा दुई हजार २६ जना प्रतिनिधि र आयोजकका हैसियतमा ३१५ जना गरी कुल दुई हजार ३४१ जनाको सहभागिता रहेको एमालेले जनाएको छ ।
तस्बिर हेर्नुहाेस्
