काठमाडौं । उपसभामुख इन्दिरा रानालाई कारबाही गर्न सत्तारूढ दल नेपाली–कांग्रेस र नेकपा एमालेले फेरि गृहकार्य सुरू गरेका छन् ।
मानव तस्करी गरेको आरोपमा रानामाथि कारबाही प्रक्रिया अगाडि बढाउने तयारी भएको स्रोतले जानकारी दिएको छ । नेपाली कांग्रेसका शीर्ष र प्रभावशाली नेताहरूको हालै बसेको बैठकमा उपसभामुख रानामाथि कारबाही प्रक्रिया अगाडि बढाउनेबारे छलफल भएको थियो ।
रास्वपाबाट उपसभामुख निर्वाचित भएकी रानाले केही व्यक्तिलाई अमेरिका पठाउन भिसा सहजीकरणका लागि लेखेको पत्रका आधारमा उनीमाथि कारबाहीको तयारी शुरू भएको थियो ।
२०८१ साउन महिनामा सत्ता समीकरण फेरबदल भएलगत्तै रानामाथि कारबाही गर्ने तयारी सत्ता गठबन्धनका दलले शुरू गरेका थिए । रानाले असम्बन्धित व्यक्तिलाई भिसा सहजीकरणका लागि पत्र लेखेर मानव तस्करी गरेको भन्दै संसदमा समेत उनको राजीनामा माग गरिएको थियो ।
एक वर्षसम्म सेलाएको उपसभामुख माथिको कारबाहीको विषय पुनः चर्चामा आएको हो । यसबारे नेपाली कांग्रेसका सभापति शेरबहादुर देउवाले पार्टीका नेताहरूसँग छलफल गरेका थिए ।
संवैधानिक परिषदमा आफ्नो प्रतिनिधि नभएकाले कांग्रेसले उपसभामुख हटाउने विषयमा यसअघि पनि जोडबल गरेको थियो । राज्य व्यवस्था समितिका सभापति रामहरि खतिवडाले गम्भीर प्रश्न उठेकै बेला उपसभामुखले राजीनामा नदिँदा अन्योल भएको बताए ।
उपसभामुखले अमेरिकी दूतावासलाई लेखेको पत्रबारे प्रतिनिधि सभाको राज्य व्यवस्था समितिमा उजुरी परेको थियो । सोही खालको उजुरी नेपाल प्रहरीको केन्द्रीय अनुसन्धान ब्यूरो ९सीआईबी०मा पनि परेको थियो ।
सन् २०२३ को फ्रेब्रुअरी २ मा आफूसहित ५ जनाको भिसा सहजीकरणका लागि उनले अमेरिकी दूतावासलाई पत्र लेखेकी थिइन् ।
