काठमाडौं । परराष्ट्र मन्त्री आरजु राणा देउवाले सरकार परिवर्तनको सम्भाना नरहेको बताएकी छन् । शुक्रबार थाइल्याण्डबाट परिवारसहित फर्कने क्रममा उनले सरकार परिवर्तन विदेशमा गइ नभइ नेपालमै रहेको बेला हुने भन्दै सरकार परिवर्तनका लागि विदेश गएको भन्ने विषयमा सत्यता नभएको दाबी गरिन् ।
थाइल्याण्डमा राजनीतिक भेटवार्ता नभएको र युएन वर्किङ सेसनमा केन्द्रीत भएको बताइन् । कांग्रेस सभापतिसमेत रहेका आफ्ना पति शेरबहादुर देउवा राजनीतिक भेटघाटका लागि नभइ उपचारका लागि गएको उनको भनाइ छ ।
सरकार परिवर्तन हुन लागेको बारे पत्रकारले सोधेको प्रश्नमा राणाले यस्ता समाचार मनोरञ्जनका लागि बेलाबेलामा आउने तर्क गरिन् ।
‘मनोरञ्जनका लागि यस्तो समाचार आउने गर्छ,’ उनले भनिन्, ‘सरकार परिवर्तनका लागि नेपालमै बस्नु पर्ने होला विदेशमा गएर हुँदैन ।’
सरकार ढल्ने चर्चाका बीच प्रधानमन्त्री ओली र कांग्रेस सभापति शेरबहादुर देउवाबीच बिहीबार साँझ टेलिफोन संवाद समेत भएको राणाले जानकारी दिइन् ।
‘बेलुका सभापति र प्रधानमन्त्रीज्यूका बीचमा बेलुका ७ बजेतिर फोनमा कुराकानी भयो’ स्वदेश फर्कने क्रममा विमानस्थलमा राणाले भनिन् ।
