काठमाडौं । सहकारी ठगी, सम्पत्ति शुद्धीकरण र संगठित अपराध मुद्दामा अनुसन्धान गरिरहेको प्रहरीले राष्ट्रिय स्वतन्त्र पार्टीका सभापति रवि लामिछानेलाई अदालतमा उपस्थित गराएको छ ।
पुनः म्याद थपका लागि लामिछानेलाई आइतबार बिहानै कास्की जिल्ला अदालत पुर्याएको हो । रविसँगै छविलाल जोशी, लीला पछाई र रामप्रसाद खनाललाई पनि अदालत पुर्याइएको छ ।
लामिछानेमाथि अनुसन्धान गर्न अदालतले यसअघि कात्तिक २५ गते १३ दिन म्याद थप दिएको थियो । कात्तिक २ गते काठमाडौंबाट पक्राउ परेका लागिछानेमाथि अनुसन्धान गर्न प्रहरीले पहिलो पटक ६ दिन, दोस्रो पटक ७ दिन र तेस्रो पटक १० दिनको समय पाएको थियो ।
लामिछानेमाथिको अनुसन्धान बाँकी नै रहेकाले पुनस् म्याद थपका लागि अदालत उपस्थित गराइएको जिल्ला प्रहरी कार्यालय कास्कीका डीएसपी बसन्तकुमार शर्माले जानकारी दिए।
रविलाई बयानका लागि काठमाडौं झिकाउने समेत तयारी छ । उनीमाथि कालीमाटीस्थित स्वर्णलक्ष्मी बहुउद्देश्यीय सहकारी संस्थाको रकम अपचलनमा पक्राउ पुर्जी जारी भइसेको छ । रविसँगै पक्राउ पुर्जी जारी भएका छविलाल जोशी र कुमार रम्तेललाई काठमाडौंमा बयान लिएर पोखरा पठाइसकिएको छ ।
